” حقائــق مـن المؤامــرة “

عندما السوريين المغتربين يتكلمون مع السوريين في بالبلد وبيفضفضوا لبعض… هذا ما يحدث :

  • السوري في تركيا: والله البلد حلوة وفيها مناظر حلوة بس بدك تتعذب خيرات الله هون ، وهون كل مين ايدو الو ولا تحلم حدا يعطيك ليرة …

  • السوري بأمريكا: نحنا هون مضطهدين والضرائب هلكت سمانا نيالكم انتو عالأقل ما عندكم ضرائب.

  • السوري بالسعودية: انتو مفكرينا مبسوطين هون والمصاري عم نلاقيها بالشوارع لو تعرفوا حقارة الكفيل والرسوم يللي بدفّعنا ياها كل سنة بكفّي الهـوا يللي عندكم بـردّ الروح.

  • السوري بالسويد : ما عاد عطونا اقامات متل قبل ويادوب عم ناكل ونشرب ونسكّج حالنا لآخر الشهر.

  • السوري بألمانيا : أوعى حدا يجي لهون صار عجقة كتير وعم ينيمونا بالشوارع أوعى حدا يفكر يجي يعني إذا ما متنا بالبحر رح نموت من البرد .

  • السوري بالإمارات : الله وكيلكن كل شي غالي واللي منشتغل فيهم يادوب يكفونا أكل وشرب وفواتير وما عم يعطوا حدا فيزا نحنا وبالزور حاطينا عندن الله يستر ما يقولولنا ارجعوا .

  • السوري بلبنان: كرهانين حالنا والذلّ بعمرنا ما شفناه إلا بهالبلد، اللبنانية ما تاركينا بحالنا وما عم نسترجي نطلع من البيت بعد الساعة 6.

  • السوري بالجزائر: الشعب طيب والبلد منيحه بس الحكومة الله يسامحها لا فيزا لا اقامات لك حتى عقد أجار بيت ماعادوا خلونا نعمله .

  • السوري بالسودان : الشعب أطيب من هيك الله ما خلق بس الرواتب كتير قليله والعيشة نار يعني إذا شقيت حالي ما بطالع 200 $ يا دوب ادفعهن أجار بيت .

  • السوري بليبيا : البلد فيها خير كتير بس نحنا ما عاد مرغوب فينا متل الأول ، الشعب كتير عم يقسى علينا والعيشة صايرة غالية والخدمات سيئة كتير .

  • السوري في مصر الشعب ماشي حاله معنا بس وقت مصلحته كل شي لحال ، والحكومة كل يوم عن يوم عم تغلّي الأسعار والشغل قليل لدرجة ابن البلد نفسه ، ما ملاقي شغل خليها لربك أحسن شي .

  • السـوري بسوريـا : لمّـا بيحكـي مـع كـلّ هـدول : طـوّلــوا بالكـــم بيعينكــم الله أزمــة وبتخلـص إن شـاء الله، أمانــة إذا لازمكـن شـي مـن الشـام لا تستـحوا. اخــوات نحنـا …..

 

 

” د . بسـام أبو عبد الله “

 

 

اترك تعليق

كن أوّل من يعلّق

نبّهني عن
avatar
‫wpDiscuz